Joe 3 | NdeIBE | STEP | “Ngalezozinsuku langalesosikhathi, lapho sengibuyisela inhlanhla kaJuda leJerusalema,

Joel 3

Izizwe ziyahlulelwa

1 “Ngalezozinsuku langalesosikhathi, lapho sengibuyisela inhlanhla kaJuda leJerusalema,

2 ngizaqoqa izizwe zonke ngizehlisele eSigodini sikaJehoshafathi. Lapho-ke ngizazahlulela mayelana lelifa lami, abantu bami u-Israyeli ngoba zahlakazela abantu bami phakathi kwezizwe, zabelana ilizwe lami.

3 Zenza inkatho ngabantu bami, zathenga amawule ngabafana; zathengisa amankazana ngewayini ukuze zinathe.

4 “Manje-ke lisolani ngami, lina Thire leSidoni lani lonke zifunda zaseFilistiya? Liyangiphindisela ngolutho engilwenzileyo na? Uma lingiphindisela, ngizaphanga ngibuyisele elakwenzayo phezu kwamakhanda enu ngokuphangisa. 5 Ngoba lathatha isiliva sami legolide lami lathwalela lenotho yami eligugu emathempelini enu. 6 Lathengisa abantu bakoJuda laseJerusalema kumaGriki, ukuze libase khatshana lelizwe labo.

7 “Khangelani, ngizabavusa ezindaweni elabathengisa kuzo, njalo ngizabuyisela phezu kwamakhanda enu lokho elakwenzayo. 8 Ngizathengisa amadodana enu lamadodakazi enu ebantwini bakoJuda, njalo labo bazawathengisa kumaSabheya, isizwe esikhatshana.” UJehova usekhulumile.

9 Memezelani lokhu ezizweni lithi: Lungiselani impi! Vusani amabutho! Wonke amadoda empi kasondele ahlasele.

10 Khandani amakhuba enu abe zinkemba lemihedla yenu yokuthena izihlahla ibe yimikhonto. Obuthakathaka kathi, “Ngiqinile!”

11 Wozani ngokuphangisa, lonke lina zizwe zasezinhlangothini zonke, libuthane khonapho. Yehlisa amabutho akho, O Jehova!

12 “Izizwe kazivuswe; kaziye eSigodini sikaJehoshafathi ngoba ngizahlala khona ukwehlulela izizwe zonke zasezinhlangothini zonke.

13 Hehethani ngesikela ngoba okuvunwayo sekuvuthiwe. Wozani, gxobani amavini, ngoba isikhamelo sewayini sesigcwele lezimbizakazi seziphuphuma – bukhulu kangaka ububi bazo!”

14 Amaxuku, amaxuku esigodini sesinqumo! Ngoba usuku lukaJehova luseduze esigodini sezinqumo.

15 Ilanga lenyanga kuzakuba mnyama, lezinkanyezi zingabe zisakhanya.

16 UJehova uzavungama eseZiyoni aphinde akhwaze eseJerusalema; umhlaba lomkhathi kuzagedezela. Kodwa uJehova uzakuba yisiphephelo sabantu bakhe, inqaba yabantu bako-Israyeli.

Izibusiso zabantu bakaNkulunkulu

17 “Ngakho lizakwazi ukuthi mina, uJehova uNkulunkulu wenu, ngihlala eZiyoni, intaba yami engcwele. IJerusalema izakuba ngcwele; kayiyikuphinda ihlaselwe ngabezizweni futhi.

18 “Ngalolosuku izintaba zizagobhoza iwayini elitsha, lamaqaqa ageleze uchago; zonke izindonga zakoJuda zizageleza amanzi. Umthombo uzantuntuza endlini kaJehova uthambise isigodi saseShithimi.

19 Kodwa iGibhithe izachithakala, i-Edomi ibe yinkangala elugwadule, ngenxa yodlakela olwenziwa ebantwini bakoJuda lapho bachitha khona igazi elingelacala elizweni labo.

20 KoJuda kuzahlalwa khona kuze kube nininini laseJerusalema kuzahlala izizukulwane zonke.

21 Umlandu wabo wegazi, engingakaxoli ngawo, ngizabaxolela ngawo.” UJehova uhlala eZiyoni!